REHEFA (Volatiana Rahaga)

Rehefa iny lasa ianao,
Ny mba kinasako tsy misy vanona,
Ny aingam-panahiko avy no mandao,
Ny fiainako mihitsy no mijanona.

Rehefa iny lasa ianao,
Mitsonika ny famataranandro,
Mandrahona ny orana hitatao.
Latsa-baratra mivolo fara-andro.

Fa rehefa iny kosa ianao tampody,
Miverina ny tsikiko nandalo fahirano,
Indreny velon-kira indray ny fody,
Miantsa ahy akoho taman-trano.

Tsy nampoiziko fa rehefa iny lasa ianao,
Toa ny masoandro mihitsy no mizahozaho,
Fa vao injay miserana ilay salovanao,
Dia toa miara-paly amiko ilay 'zao tontolo izao.

VR.06-08-08.
--------