Tsindrio fa lavo (Ny Avo Elabakaka)

Nahetry ny lanjany rariny, navadika ilay tena hitsiny
Nofoanana ny tody sy tsiny, nahifika hiala any an-tsisiny
Dia samy manao izay tiany ny manambola sy manankatao
Manao izay daniny kibony, hanindrina madinika izao.



Ny fanambakana no lohalaharana entina hitadiavan-karena
Dia izahay madinika ihany no voatsindry, nefa efa ory sy mampahonena
Ka an'iza ny fitovian-jo sy ireo fahamarinana?
Dia nohamaivanina ve hampanjakana ny jery tongilana?



Norahonana izay mba nampiseho, fa tsy rariny ny zavamitranga
Tohan-kevitra no nantenaina, nefa fahafatesana no arangaranga
Dia aiza ny marina amin'izany, notehirizina ho rakitry ny ela
Tsy ampiasaina fa atao rehareha hoe: ny marin'ny Gasy dia mbola tavela.
--------