RY ZAZAVAVY KANTO (Fidy Art Niaina)

Ianao ilay zazavavy
nanaitra indray tsy satry
ity fitiavako natory.
Izaho ilay manavinavy,
indraindray mararirary
raha tsy jinerinao akory.

Izaho ilay mipitrapitra;
foana koa mangata-maso
rehefa injay ianao ka hitako.
Dia avy eo mitsiriritra;
te hiantso hoe andraso
nefa hatreto aloha tsy vitako.

Na ny alina aza moa,
rehefa alohan'ny hatory
zary manofinofy anao.
Ary vao maika koa
lasa toa manorisorisory
rehefa tsy an-jotra ianao.

Ka eo aho mba miangavy!
Tsy rediredy na hoe katry
fa tsiambararoa mahaory.
Ianao ilay zazavavy
nanaitra indray tsy satry
ilay fitiavako natory.

Fidy Art Niaina - 03 Jolay 2023 - 21h32
--------