Rehefa aty Andafy (Karako)

Izaho aty ry Neny...
ka mandeha miantsena,
Mividy anana sy hena...
Tsy eo intsony i Soa
...Hay tokoa moa !

Izaho aty ry Neny...
ka manasa lamba,
mipasoka tsy mihamba
fa tsisy "Jacqueline":
voasolon’ny masinina.

Izaho aty ry Neny...
manatitra ireo zaza
na d'efa reraka aza
Fa tsy aty i Velo
‘bakoina hoe "Atero !"

Izaho aty ry Neny...
ka mandray angady
Fa tsisy asa fady :
tsy eo anie Rakoto
ho iraka sy boto.

Izaho aty ry Neny...
Manapaka kitay
Tsisy hoe tsy hay
Fa dia izaho ihany
No manao izany !

Izaho aty ry Neny...
mianatra mandrafitra
miasa sy finaritra
Tsy miandry "tanana"
mikoja izay ananana.

Izaho aty ry Neny...
Manao ny rehetra rehetra
Voatery miova toetra:
Tsy miankina amin'olona
Nefa tsy miolonolona !

Karako
Canada - 2013-08-07
--------