Ilay tena tiako (Nalison Randrianaivo)

Ilay tena tiako

Izay tena tiako, no hotolorako izany;
Tsy mba mandalo, fa maharitra hatrany.
Fitiavana mamy tsy mety miofo:
Halaiko ho vady omeko porofo.

Izay voafidiko ihany no mahazo!
Ity raozy mena tsy mety malazo;
Ka homeko voady satria ho doria:
Hipetra, hanaja ho madio ilay fitia.

Izay voasoratra amiko tsy hay fafana!
Fa efa voasoratra amin'ny lalàna;
Mizotra tsara amin'ny fahamarinana,
Izay mampisaraka tsy ahita mangirana.

Ianao io, ilay efa anjara.
Efa voasoratra amin'ny tantara:
Ho vadiko hiteraka dimby sy fara,
Ilay tokana iray tsy mizarazara.
--------