You are here: home > Vetso

NY KALO TENA KANTO - Ainampaniry Anjara Nivo

NY KALO TENA KANTO

Ny kalo tena kanto amin'ny kalokalo maro
Dia ireo izay mitantara ny fahazazànao io,
Mandrakitra an-tadidy ny lasanao nandalo
Fony ianao mpanjakan'ny fisainana madio.

Ny kalo tena kanto tsy izay hiran'alahelo
Mahatonga sentosento sy mamendrofendro lava;
F'ireo izay nahavaky ny fitia tsiambaratelo
Mitoetra am-po manginanao kanefa tsy voalaza.

Ny kalo tena kanto: tsy hiram-po nilaozan-tiana,
Mampianatra ny nofo sy ny vava hiantso tody;
Tsy trangam-pisarahana lamaodin-tononkira
Fa anaram-boninahitry ny "Vetso fanafody".

Ny kalo tena kanto tsy izay kalom-pahajambàna
Manambara fientanana am-pandriana. Mahonena!
Tsy izay soratra miventy rediredina filàna;
Fa ny kanto tena kanto: "fampitàna fahendrena"!

Ainampaniry Anjara Nivo

Sokajy : Aingam-panahy

Hevitra mandeha

MAZ RAMANA (07/06/2021 12:08:18)

Hita taratra be hoe sady tia mozika no mpamoron-kira! Diso ve?

Ainampaniry Anjara Nivo (08/06/2021 18:59:47)

Ny tia mozika aloha dia zato isan-jato e. Fa ny hoe mpamoron-kira tsy dia izay loatra, kanefa koa misy tononkalo azo havadika ho hira soa aman-tsara ka.