Niaretany ny mafy (andriary)

Lavitra ny lalana
Ny lalana nalehany.

Sarotra ny fiainany
Ny fiainana natrehany!

Tendrombohitra mideza
No tsy maintsy nandehanany
Tany feno fandrika
No tsy maintsy nitsanganany!

Namakivaky tany efitra
Ny hafanana tsy nadefitra
Kitoan-tany tomandavana
Hatrery am-para-tazana!

Hetaheta sy hanoanana
No nekeny hiondanana
Havizanana tanteraka
Ny an’ny vatany efa reraka
Ny tselatra sy ria-baratra
No niaraka niraratra
Ny orana nivatravatra
Nosedrainy hatreny an-tratra!

Renirano feno mamba
Niroboany tsy nihamba
Rian-drano mampatahotra
Niampitany tsy nihaotra.
Ny esoeson-teny maro
Ny akora mifangaro
Nolanjainy avokoa.
Fa te-hanana ny soa

Ka raha ela koa ny ela
Ny fotoana tsy namela
Indro izy fa tafita
Fa ny adiny efa vita.


Ny zava-mafy nihatra taminy
Tao ambadiky ny maminy

andriary
--------