TASIN-DRINDRINA - andriary

Azo vakiana?

( Fetin'ny reny hoy ianao ! misy fo maratra sy mitomany any ho any ,....dia ireo tsy manana)


Ny sorasora-drindrina
Nisy ny anaranao , vinaky teny ho eny
Dia mariky ny banga ,
Ao anatinao , f'ireny no miteny

Eritreritrao mitady azy
Hatrany anaty nofy , mba hampisy ny fisiany
Satrinao hiantsoantso
Miverena hiampofo , hitrotro 'ty tsy manan-tsiny.

Ny tranon'ny kamboty
Lasa ankaninao , tsy nanome anao akory
Tontolom-pifaniana
Mba hanadinoana ny lasa , fa vao maika nampahory

Raha nataonao ny sariny
Am-penina sy taratasy , narahin-tsento lalina
Dia variana ianao nibanjina,
Dia tsy fantatrao intsony , ny atoandro sy ny alina

Ny tsy mahalala anao
Dia manesoeso eny , ka mahavatra teny ratsy
Ratram-po tsy hay tohaina
Indrisy fa tsy mahafantatra , ny fiainanao feno tasy

Ny mahafantatra indray
Namana tsy mahafoy , dia miezaka hampitraka
Fa miserana ihany,
Ka tsy mahafeno akory , ny banga efa lalim-paka


Raha teo am-baravaran-kely
No nitazananao ny kintana , nibanjinanao ny lanitra
Satrinao tsy niala teo
Mba hamantaranao ny aminy ,hanontany an'Andriamanitra

Ny sorasora-drindrina
Nanoratanao ny anarany , lay nianaranao niteny
Dia taratry ny hafatra
Mahery setra anatinao , hoe miverena re ry Neny!

Hametraka hevitra

Midira aloha

Mombamomba

Mpanoratra : andriary

Nampiditra : andriary
Daty : 21/05/2013
Mpamangy : 837
Mankafy : 0

Tononkalo hafa

NOVONOINY FA TSY MATY
Taniko...sy tomaniko
ROTIKA
MPANKAFY
....nifandamoro
MPAHARY MATIHANINA
Tsiahy lalina
Tany rava
Embona masiaka
TSIAHY MAMATONALINA