Sangy ve sa sompatra? (andriary)

Nirefotra ny varatra
Niaraka namafatra
nandratra ny any am-poko
indro izy mitoloko!

Sangy ve sa sompatra?
No nandoro sy nandopatra
hatrany an-tampon-doha
nosesefana longoa!

Sahisahy nietraketraka
sahisahy nampitresaka
ny hazavako niparasaka
nisy haizina nanasaka!

Fa ny lahatra hafahafa
no nandalo nanatsafa
Ka ny vitsy mba nananako
no nalaina teny an-tanako!

Dia iza loatra moa ianao
no dia sahy mihintsinjao
ka manao zara miangatra
Amin ny voatavo tsy mifandraka?

andriary
--------