You are here: home > Vetso

RAHA MBOLA MISY - Lantorose

Azo vakiana?

Raha mbola misy ny lanitra sy tany.
Dia antenaiko hatrany.
Fa indray andro any.
Ito fireneko ho lasa nosy iray.
Ho lapam-pihavanana , vahoaka mifandray.
Ho foana ny adiady.
Fa handry fahalemana.
Tsy hisy omby very na vorona tsy ho hita.
Raha tondraka ny rano hahay miara-mita.
Tsy misy mana-pahefana sy hoe olo-tsotra.
Fa Malagasy iray no anarana havoitra.
Atao mitovy tantana.
Ny zo sy tombotsoa.
Eny hetaheta, faniriako ihany koa.
Ny loko politika mavo ,mena, mainty manga.
Hatao tokambolo mitovy saranga.
Eny ampitoviana hatramin’ny tadin-dokanga.
Tsy hisy ambony ambany.
Ho marindrano hatrany.
Ka ireo anarana, karazana foko maro be.
Tsy hifangaringarika raha eny an-dalambe.
Fa hahay hanambatra ilay fahasamihafana.
Ho tonga haren-tsaina.
Ho entina hirehàna amin’izao tontolo izao.
Fa malagasy tia fiombonana izaho sy ianao.
Ireo antoko-pivavahana sy finoana maro samihafa.
Tsy hifanao tsinotsinona fa hanaja ny hafa.
Ho tonga mpampihavana.
Handray ny hafa ho havana.
Ireo olomboafidy sy olomboatendry.
Mba ho olombanona sy ho olokendry.
Hampitovy tantana ny vahoaka entiny.
Amin’ny fomba sy fihetsiny.
Ny zanak’ikala hafa.
Ny kely fanambaka.
Mba ho lavitra azy.
Raha mbola misy ny lanitra sy tany.
Ho tò ny faniriako indray andro any.
Isika malagasy.
Hahay hiray lasy.
Hiaraka hiredona ny hiram-pirenena.
“He sambatra tokoa izahay”.



Mombamomba

Mpanoratra : Lantorose


Nampiditra : IHARILANTO
Daty : 17/08/2022
Mpamangy : 101
Mankafy : 1

Tononkalo hafa

VAVAKA
NAHOANA
Malala lavitra ahy
Ny andro anio