You are here: home > Vetso

TSIAHY - MPANAZARY

Azo vakiana?

Indray hariva izay efa mena vodilanitra
Nisy fahatsiarovana iray tonga tato an-tsaiko
Toa niserana nandalo, iza laotra fa tsy haiko
Tovovavy anakiray manana endrika maranitra

Toa ohatran’olona efa hitako, taiza anefa moa?
Iza laotra ary ianao?toa manadala ny ambiroa
Nisaina kely, namerimberina ireo lasako taloha
Teo vao tsiariko,fa ianao dia ianao tokoa:
Ilay tovovavy nihaona tamiko kisendrasendra
Fony izaho mpiliba, mbola mpirendrarendra
Teny antokotaniben’ny ditra sy ny hadalana
Fahatsiarovana tsy lefy,tsy hadino tsy hay fafana

Fihaonan’olondroa tao anaty hatanorana
Nogejain’ny haizimpito,notolomim-pahafahana
Tsy haiko aloha na sitrapo sa hoe: tsy fahalalana?
Kanefa dia nahatonga ilay taram-pahazavana
Ianao dia ianao tokoa,ilay vehivavy nankahalaiko
Fa hoe mpitory teny,manelingelina ny saiko
Kanefa tato aoriana nahitako fifaliana
Ny angolangolateninao sady tena nahaliana

Hay ianao ilay tovovavy manana endrika maranitra
Notsarovako tao anaty mena vodilanitra
Hay ianao ilay tovovavy,nieloelo tato an-tsaiko
Tsy ho adinoko ny soa noentinao ry sombiniaiko

Sokajy : Fahatsiarovana

Hevitra mandeha

Zozoro (10/08/2011 12:00:13)

Tanteraka zany le nofy ô!