ALEO HATREO… (RRAG)

ALEO HATREO…
Aleo hatreo ny fahanginako,
ka hosokafako ny vavako!
Ary ny lasa tsy hiankinako,
sao havesatra tsy ho zakako!

Na dia lasa aza ianao,
Eny! Na dia hoe ninia nandao!
Dia ho ataoko vita anio,
ny ranomaso nentin’io.

Aleo hatreo ny fahandeferako,
sao ho fingam-panenenako,
ny fahatsoram-po ‘zay entiko!
Ka hampihombo ity aretiko.

Na ho ràtram-poko aza,
dia haveriko mazava,
fa satriko tsy hizonga intsony,
izato fiainan-donilony.

Aleo hatreo ny fahajambako,
raha toa nitondra ny hadalako.
Aleo hangina dia tsy hiteny,
ny ratsy vita teny ho eny.

Fa sao hanitatra ny zaitra!
Zaitram-pery ‘zay tsy laitra!
Toa milona fa tsy maina,
ka mandevy ny herin-tsaina.

Aleo ho hatreo ny fijaliako!
Aleo ho hatreo ny fihafiako!
Sao ho vesatra tsy zaka,
ka ny foko no ho voambaka.
Voambakanao ry hajambako!
RRAG
11 Jona 2012
--------