INDRISY...! (18 Aprily 2022) - RRAG

Azo vakiana?

INDRISY...!
Finiavana ny anay, ny hahatonga azy ho ary,
hisy sy hitoetra, anilan-dRay sy Reny...
Fa hafa mihitsy ry aina 'lay laha-janahary,
nitondra fo hisaona, gina tsy hahateny!
Tsy takatry ny saina, ny soa hatolo-tanany...
Fa mety hahafoiny mihitsy, hahatramin'izay ananany!
Mbamin'ny tsy eny an-tanany!

Ny avo no hoe mpandahatra a?
Fa toy ny ahoana loatra, ny sarisarin-kevitry ny soratra voasorany?
Ora valo monja, dia indro fa nitsahatra,
tsy nitepo intsony ny fony te hitroatra, tinapitra ny orany.
Fa teo ny fara-tsoratra, am-pejin'ny tantara!
Nahoana kosa e? Nahoana no hoe dia 'zay no anjara?

Finiavana ny hitraka, raha iny resin'ady,
ka lavo teny an-tolon'ny setrasetra sahady,
'lay sombiny nirina, hisy sy hitoetra!
Indrisy anefa, valo ora no hany fetra!
Nangina ilay tomany, taorian-tsento roa,
ka niato tsy nitepo, teo koa 'lay fo...!

Ny avo no mpamaritra a?
Mpandrindra izay tantara, lalovan'olombelona...
Hatreo ve no fara faritra, nahafahany nivelona,
tanilan-dRay sy Reny, nikatsaka ny hikolo!
Nefa indrisy! Finiavana Ny Avo dia tsy hisy hahasolo...
Fa dimby fotsiny ny hoavy, raha toa ka tongasoa!
I Finiavana Ny Avo, sisa, mivelona any am-po...
Tsy voafafa na voakosoky ny soratra vaovao...
Fa i Finiavana Ny Avo, no voaloha(ny) nitoetra tao!
RRAG
18 Aprily 2022

Ho an-dRAKOTONDRAVAO Finiavana Ny Avo (Teraka ny 14 Aprily 2022 tamin’ny 01ora tolakandro ary resin’ny fiainana ora 8 tao aorian’izay, izay tamin’ny 09ora alina) tsy foin'i Dada sy i Neny! Mivelona ao am-ponay mandrakizay!

Mombamomba

Mpanoratra : RRAG

Nampiditra : RRAG
Daty : 23/06/2022
Mpamangy : 29
Mankafy : 0

Tononkalo hafa

IZANY VADY IZANY…
EO...! (19 Janoary 2022)
IZAHO...! (25 Febroary 2022)
KOA RAHA TSY MITAPY…
INDRAY NITETE...
TSIARO TIANA...
NIANATRA NITIA...
NISARAKA HONO…!
"LOVE" AKIA NY FO A!
VATO MIKITOANTOANA…