ANDO… (RRAG)
Mbola tsisy niantsa
(Nalaina tao amin'ny vetso.serasera.org)
ANDO…Miandoha finaritra ny fo ‘zay mitia.
Miandoha hasasarana ny ahelan’ny dia.
Miandoha tomany, ny fanantenana!
Ny andon’ny maraina, mitondra hazavana.
Miravo hafaliana, dia misioka ny vorona!
Ny ando sy hamamiana, no fameno tolona.
Ka avela ho an’ny alina, raha ny olana.
Fa handeha hararaotina, izato diavolana.
Mifaly ny ankizy, ny mpianakavy mitafa.
Mibanjina kintana, dia mijery ny lasa!
Manao vinavina, izay hokinasaina.
Mamaky ny dina, amin’ilay hantenaina!
Dia tsy iza izany, fa ‘lay raozy manga!
Olon-kendry mihitsy, fa tsy mba olo-manga.
Safidin’ny fo, sady andon’ny aina.
Namafa ny fery, ‘lay nampitaraina!
Miandoha tsikitsiky, ny fahasambarana.
Vinavinaniana hoe, rahoviana no hifarana?
Fa satrin’ny fo, tsy ilaozan’ny nofy,
‘lay andon’ny maraina, ‘mbola mitosy.
Ando, tokana nefa hanana-maro.
Tsy asiana fanampiny, na afangaro.
Fa dia ando eny ihany, ho an’olo-manina!
Fitia madio, fa tsy sangodim-panina.
Ando, raha toa ka isaina, toa isa tokana.
Firenen’ny fitiavana, tsy mitokantokana.
Maneho hatrany, ny firaisankina.
Na tsy hisy aza fetra, na tsy hisy aza dina!
RRAG
11 Jona 2012
--------
Rohy:
