ARITRA… (RRAG)
Mbola tsisy niantsa
(Nalaina tao amin'ny vetso.serasera.org)
ARITRA…Niaritra aho satria, nihevitra ho tiana,
saingy indrisy, fa zary nahavariana,
ilay fandaozanao, tsy nisy mba veloma,
toy ny, nifono raorao, nahatonga fo nisaona.
Miaritra aho satria, diso tianao!
Miandry ilay fitia, fitia izay nandao,
ilay akanim-poko, tsy mbola nosoloiko.
Ny endrikao miserana, toa tsy mbola foiko!
Miaritra aho fa tia, na aza, hitsahinao!
Izay no nahatonga, ny foko tsy hitalaho.
Nefa, tsy nanalavi-maso, ilay akanintsika!
Niaritra irery, ny fidodon’ny hatsiaka.
Miaritra aho fa jamba e! Tsy misy mba mijery.
Moana hatramin’ny vavako, kanefa, miteniteny irery,
manofy anao tsy fidiny, mitroatra ny tadidiny.
Te hanadino anao, fa saingy misy vidiny.
Hiaritra aho satria, misy fanantenana,
reko injay misafo, ny entam-poko leo mitroatra.
Injany, mitondra hafanana,
tsinapako manafy, mandefy ny hararaotra.
Hiaritra aho satria, ianao ihany angamba,
no hany tokam-poko, sy hany nahajamba,
‘ty masoko nijery, ninia nitia anao.
Na dia nivadika, nivadika ho talaho!
RRAG
20 Jona 2012
--------
Rohy:
