BITSIKA… (RRAG)
Mbola tsisy niantsa
(Nalaina tao amin'ny vetso.serasera.org)
BITSIKA…Mitsoka vao maraina, ny rivo-manitr’ala,
ny zavona misava, misintaka miala.
Mitinaratra mangina, ny taratry ny masoandro,
mibitsika amin’ny tiana, toa ho efa ho isan’andro.
‘Lay bitsika fitia, novinakin’ny fo.
Injay! Injay fa reko, reko toa misafo,
misafon’ny hakanto, hakanton’ny fitia.
Manarom-po roa, izay miara-dia.
‘Lay bitsika mandalo, mandrava faniriana,
no lasana nikalo, raha vao rava vina.
Dia lasana akom-po, mitoetra ho amboara.
Voarakitra ho boky, voasoratra ho tantara.
‘Lay bitsika mangina, nahatonga fo nisaona,
no nivadi-bolamena, raha nivadika ‘ty taona.
Ka zary toa firavaka, mandravaka fitia.
Tsy ho mpandrava intsony, eny sanatria!
Ireo ilay hoe bitsika, nahay nifampitantana,
nandrafitra akany, ho akanim-pahasambarana.
Tsy ho lefin’ny adiady, mety hinia hisedra,
fa ho bitsika iray, farany ‘zay ‘ngeza.
RRAG
Jolay 2012
--------
Rohy:
