FAKA TSY HITA FOTOTRA… (RRAG)

FAKA TSY HITA FOTOTRA…
Tsy hoe maneso akory,
raha milaza izao,
na koa manasoketa,
ny hany vitanao,
fa te haneho fotsiny,
ny hevi-mitahiry,
vao maraina teo,
no reko toa nitsiry:

“Faka ratsy fototra,
no rafitra navoatra!
Lava-tsy nitototra,
no zary hararaotra,
mitambesatra eny,
zary zoga vidi-mirary!
Modian-tsy miteny,
nefa toa marary!”

Tsy hoe manambany,
raha milaza izao:
“Fa raha ny tomany,
na koa ny ranomasonao,
tsy afaka ny hanafaka,
ny firenena itambarana,
‘zay latsaka an-davaka,
‘lay toka-nifatrarana,
foiny tsy noheverina,
fa mety hitamberina,
ka ho zary tody,
tsy ho sitram-panafody,
ilay ankasomparana,
‘zay tsy ela dia hifarana,
ka hototofan-tany,
ho tsara faka ihany,
na dia tsy hita fototra”.
RRAG
Aprily 2012
--------