FASANA VOALOHA… (RRAG)

FASANA VOALOHA…
Ry olo-nofinidy, tsy manam-paharoa,
ianao no safidy, fasana voaloha…
Fasako iray, mamatotra ny saiko,
ho mandrakizay, mandrapiala ny aiko.

Ny lahatra no fototra, nahatonga anao.
Ny tendry no nandrafitra, izay vao nisy ianao.
Ny anjara kosa, no isan’ny mpandalotra.
Ianao ry ‘lay fitiavako, no ataoko tsara fatotra!

Hamatotra ny foko, amin’ny fo ‘ray tia.
Hanaiky ny hifamatotra, hanaiky ny hiara-dia.
Ka tsy mba hivadika, ny dina hifanaovana.
Tsy hanao ny akaniko, ho akany filalaovana!

Ry olon’ny fitiavako, nanaiky am-po madio.
Tsarovy sy araketo, ho tsiahy ny anio,
raha toa aho ka sendra, lasan’ilay faharoa.
Ataovy an-tsaina foana, fa ianao no ilay voaloha…!

Raketo hitoetra, an-tsangambatom-poko,
‘lay voady tsisy fetra, fa ianao tsy ho hafoiko,
na inona hahamafy, ny sedra hitolomako?
Dia ianao no fasako, akany fivelomako,
tsy nandao ahy, nandritra ireny ady.
Tokana namatotra, fa tsy nanapa-tady!
RRAG
Jolay 2012
--------