FELA-MAINA… (RRAG)
Mbola tsisy niantsa
(Nalaina tao amin'ny vetso.serasera.org)
FELA-MAINA…Hatsiaka mamirifiry! Injay misavovona ny lasa!
Nanafoana ny anjaran-tsafidy, rava hatramin’ireo nokinasa!
Nalazo ny felam-pitiavana, tsy noheverina mora ho maina!
Kinanjo ‘lay hoe maitso mavana, ravi-nihintsana maraina!
Misaona tokoa ve ny tany, toy ny hoe very olomanga?
Misento dia indrao mitomany, ilay fo fa hoe tena jamba!
Nanantena tsy nisy, ny higokan’ny mamin-tsafidy,
dia nitia ka nieza-niampify, nefa injay nitroaran-tadidy!
Fela-maina no sisa tsiaron’ireny lasantsika ireny!
Toa fijery nifangaroharo, fihatsarambelatsihy teny ho eny.
Misononoka ery ‘zao mandrakotra, ny fery efa niaritra ela!
Ny fofo-maimbo voatahiry, mety hamongatra ireo ‘zay tavela,
ka hamatotra ihany ny tenany, hitondra fikorontanan-tsaina!
Hadino ilay tondratondraka, sakafom-pitiavana ‘zay nantenaina.
Hafaliana mamiratra an-tava! Toa nofy ireny ankehitriny!
Fela-maina ‘zay efa nihintsana, no sisa mba nivahiny,
hany sahy niroso nitsidika, ‘lay lapam-po nitia mangina!
Foana teo avokoa ireo rehetra, hatramin’ny vinavina.
Fela-maina toa tsy hadinoina, fa fitia lalim-paka ao anaty!
Fela-maina ‘lay ivom-pinoana, fa nampitraka ny fo tsy nahatanty!
Ka niroso nitolon-tsy niato, amin’ny setrasetran’ny hafa!
Amin’iretsy minia manarato, mangalatra avy eo dia mandràtra.
Fela-maina mitahiry tsiaro, sy ‘reo lasa tanaty kinasa!
Fela-maina nitondra hirifiry, hatramin’ny teny mandatsa!
Rahoviana ‘zany vao hoe hitsiry, hamelana indray ny fitia?
‘Ndeha atao tsara tondraka mihitsy, tsy hoe dia hiriaria!
RRAG
01 Aprily 2012
--------
Rohy:
