FIAINANA HODIAVINA… (RRAG)

FIAINANA HODIAVINA…
Eh! Mba mpinamana ihany ve isika?
Dia izaho sy ianao Rafahazazana.
Toa ela tsy nifankahita,
raha vao tonga, Rafahatanorana.

Namam-baovao, akaiky ahy indrindra,
nananatra ahy mafy, hanova famindra.
Namana akaiky, fa mety mbola hamitaka,
nefa tsy ho ela dia, izaho no hisintaka.

Hiazo moramora, an-dRafahamatorana,
hiezaka hitraka, ho an’ny ankohonana.
Hanatanja-tsaina, ho lavi-pahakiviana,
hikendry ny hahasoa, ireo fianakaviana.

Fa tsy ho ela koa, dia tsy maintsy hiala,
hamonjy akany vao, tontolo mamanala,
feno hirifiry, tsiaro sy tsiahy.
Tontolo-pahosana, rakitra ahiahy!

Hisintaka hamonjy, an-dRafahanterana,
‘zay ady holalovana, an-tsento sy tomany.
Fa anisan’ireo namana, nalahatry ny fiainana,
hamadika ny nofoko, ho zary vovo-tany.

Ka hiazo akany vao aho, dia ny fahafatesako,
lalana hodiavin’ny fanahiko ‘zay trotraka.
Na ho fasan-tany, na koa ho fasam-bato, no hilevenako,
dia tsy afaka hisafidy, satria aho efa potraka.
RRAG
Nôvambra 2008
--------