FIANGARANA LAVA… (RRAG)
Mbola tsisy niantsa
(Nalaina tao amin'ny vetso.serasera.org)
FIANGARANA LAVA…Ry lahatra! Toa fiangarana lava no iainanao.
Ny tsiny mandrangotra, manao ‘zay tiany atao.
Fiangarana lava, no ataon’ny lanitra.
Nahoana misy ny manana, dia misy mahantra?
Nefa ny hoditra, mba mitovy ihany!
Sa izany mihitsy, no fiainan’ny tany?
Miangatra loatra, ianao re ry vintana.
Ny aliny aza, tsy tarafinao kintana,
fa volana mainty, miafina azy!
Miangatra ianao, sa izany no sazy?
Sazin’inona anefa, raha mba azo fantarina?
Sazin’ny fiainana, noho ny marina a?
Izay hinian’ny hafa, hafenina mihitsy.
Dia modian-tsy hita, nefa tsy dify.
Miangatra loatra, ny tendrim-piainana.
Tsy afaka akory, ny mba hitarainana.
Vao mainka aza, mandrendrika ny osa!
Mandoto azy mafy, mba ho bokan-trosa.
Fiangarana lava, ny an’ny tany!
Tsy foana anefa, na dia hitomany!
Hiala vonkina, hisento mangina!
Toa vara-datsaka, tsy voavinavina.
Miangatra loatra, na tsy hiaiky aza ianao,
ry fiainan’ny tany, ‘zay be raorao!
Ka aiza ny fo, no tsy mba hivetso?
Fa fiangarana lava, no iainana eto!
RRAG
11 Jona 2012
--------
Rohy:
