FISARAHANA… (RRAG)
Mbola tsisy niantsa
(Nalaina tao amin'ny vetso.serasera.org)
FISARAHANA…Tsy ny halaviran-tany, no namaritra fitia.
Tsy ‘lay hoe ambodin-trano, dia manja ery ny dia.
Fa ny fo mitepo anaty, no mandrafitra tantara.
Tia ianao, tia hono izy, dia hoy ianao hoe: “Izay dia tsara”.
Raha ny teny mantsy hono, manan’elatra ohatr’izany,
mainka moa fa ny honohono, singa fototra tomany,
foto-dratsy efa nikiky, vony tsara nidoroboka.
Raha miantehitra amin’ireny dia, tsy ho ela dia hidoboka.
Mila famatotra ny fo, mila tady mafy indrindra,
mila ezak’olon-droa, mba ho afaka hirindra.
Fa ny ziriziry foana, na ny hambom-po tsy lefy,
no mahatonga fo hisaona, satria tsy hisy afaka hietry.
Tsy hisy sahy ny hilefitra, dia hiezaka hangina,
ny adiady zary efitra, mampisaraka olon-tiana,
manafoana moramora, ny fitia mitsiry anaty.
Kinanjo lasa kajin’ora, hoe rahoviana ity no ho faty!
RRAG
12 Febroary 2018
--------
Rohy:
