FITIA TSARA TEFY…! (RRAG)
Mbola tsisy niantsa
(Nalaina tao amin'ny vetso.serasera.org)
FITIA TSARA TEFY…!Injany tomefy hafaliana, tsy homby tratra sy aty fo,
fa ho eo anilan’olon-tiana, ka ho iray fa tsy ho roa.
Toa tontosa ihany lahy, izato voadim-paniriana,
ka hiray fo fanahy, aminao ‘lay tena tiana.
Izay toky haloakako eto, dia nitsiry avy any am-po.
Aleo kely aho hisento, fa fifaliako izany aloha.
Aza atao mahagaga anao, raha sendra ranomaso latsaka,
fa izao andro izao, no zary tsiarom-pisandratana.
Hifamatoram-po ‘lay resy, nalavon’ny fitiavanao.
Ankehitriny dia mpandresy, zary amboarako ianao.
Amboaram-pahasambarako, noho ny fitia tsara tefy.
Ianao no fiadanako, mihazom-pitia mba tsy ho lefy.
Taona maro no niarahana, teo ny mamy sy mangidy.
Tsy nisy anefa nisarahana, ka nandosirana ny adidy.
Adidy ‘zay fato-pitia, mampiharina ny mietry!
Zary fitiavana doria, satria fitia tsara tefy.
RRAG
14 Martsa 2018
--------
Rohy:
