HITENY INDRAY NY FO...! (RRAG)
Mbola tsisy niantsa
(Nalaina tao amin'ny vetso.serasera.org)
HITENY INDRAY NY FO...!Sadaikatra ny tena, mihaino itony toky!
Toy ny angano, voarindra anaty boky!
Voatanisa jiaby, hatramin'ny tsy takatra,
ny lanitra ambony, ny volamena an-tatatra!
Omeko anao izao, takariko zaria!
Lazaina mihitsy aza, fa hafa ilay mitia,
rehefa mahay mizara!
Asa a! Inona? Angamba farafara!
Alainy hono irony kintana, omeny anao ny volana...
Ianao hoe tsara vintana, miaraka aminy tsisy olana!
Fa tsikitsiky lava, tsy takatra takarina,
fitia tena izy, fa tsy namboarimboarina!
Ny fampanantenana, injay miraradraraka,
miary nofinofy, omban-daza masaka!
Mihondam-piadanana e! Mitsako fahasambarana!
Rakofam-bolamena, hatramin'ny rantsam-batana!
Dia mino koa ianao, fa hiadana finaritra,
mijoboka an-kaizin'ny tsisy ady varotra!
Manaiky ny angolany, babon'izato teniny!
Tsy nanopy maso akory, 'zay mbola misiteriny!
Tsy leo ny voadona, mizaka fahakiviana,
hamafazany haingon-teny, dia revo sy variana!
Kanefa ireny tetika, hamaboany anao!
Fihetsi-panafenana, ny loza hitatao!
Dia anao ny anao, raha mbola be di-doha...
Fa rehefa ory ve, tsy hiteny indray ny fo?
RRAG
13 Mey 2021
--------
Rohy:
