I ONJA… (RRAG)

Mbola tsisy niantsa

Hangataka antsa
(Nalaina tao amin'ny vetso.serasera.org)
I ONJA…
Any ianao ry Onja, ‘lay tovovavy tokana, nanova ny fijeriko!
Nanafaka ahy tam-ponja, nanasa ny hosim-potaka, namafa ny hombom-periko.
Any ianao tsy hita, tsy fanta-piafarana, tsy nahenoam-baovao!
Ny foko aty mahatsiaro, manina anao, ka reko mitalaho.

Toa satriko tsy hisy, ‘ty andro fialàna sasatra, raha lavitra anao.
Toa satriko mihitsy, isan’andro hianatra, fa tiako hahita anao.
Ny masoko efa jamba, tsy mahita intsony, ankoatra ny endrikao.
Indrisy ry Onja, fa toa tsy mety ho sahiko, ny hamboraka izany, anoloanao.

Ry Onja! Satriko dia satriko, ity taona ity, tsy hitovy tamin’ny lasa.
Saingy tsy afaka aho, tsy afaka aho ry Onja, tsy afaka ny hikasa!
Hanakana ny soritra, voarafitry ny lahatra, sy ny tendry nialoha.
Ka tsy maintsy hivarina ito, dia ny azoko atao, dia ny mampitony fo.

Saingy toa tsy ho vitako, raha toa ka mbola ho tazako, ‘lay endrikao sariaka.
Satriko tsy ho hita, raha handrakotra ny taratry ny masoandro tsy hibaliaka.
Toa resinao sahady, ny foko ‘lay nisakana, fitia ‘ray tsy hitsiry.
Raozy misy tsilo ny ahy, ‘lay teo antsahan’ny fo, no nirobona naniry.

Ry Onja tokan’ny aiko, nofy ihany ny ahy, ka tsy ho tsapanao.
Saingy holalaiko, anaty aingam-panahy, ilay anaranao.
Hotehiriziko iny, tsy hofafako mihitsy, fa diary iray voalohany.
Ny anaranao ry Onja, no lohatenim-boky, hisoratra amin’ny lohany.
RRAG
24 Nôvambra 2004

“Atolotra ho an’i R…… Onja …? Ilay tovovavy nanaitra ny torimasom-pitiavako voalohany sady fanomezako miafina ho azy, ho amin’ny fitsingerenan-taona nahaterahany anio” (Fantatro dia fantatro tokoa ny anarany feno saingy tsiambaratelon’ny fiainako izany, fa eny na dia i Onja ilay nanolorako ity tononkalo ity aza dia tsy mahalala izay ato am-poko).
--------
Rohy:
394 1
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0174