INDREO… (RRAG)

INDREO…
Indreo misento mitomany, mitsiahy ny efa lasa,
dia mandreto-manontany, ireo dingan-tsy nifafa,
izay miraikitra ao am-pon’ny vahoakanao ry nosy.
Nahatsapa fa efa voa, ka tsy sahy ny nitosy!

Ry nosy mamy, ny adinao izay tsy efa,
no niezahany nialàna, saingy indrisy!
Saingy indrisy, fa niantefa,
zary ferin’ny hadalany, nitondra tsiaro nitampify.

Ry fireneko rahoviana ihany, ilay fahafahanao no ho tonga?
Rahoviana ihany ry fireneko, sa ilàna fombafomba?
Toy ireny nentim-poko, tamin-tolona nataony,
raha niakaram-pahavalo, dia nampangiana ny raoraony.

Ry fireneko ilaiko maika, fa voazoga mafy aho.
Aza asiana hoe saika, fa iadivo dieny izao.
Eo ry nosy, nosin’ny aiko,
mba mivonona, toy ny saiko.

Indreo misaona malahelo, mitomany ny havantsika,
ireo vahoaka sesehena, noho ny ady izao vao vita.
Saingy indrisy tara loatra, ny nitoeram-pankahalàna,
maro loatra ireo maty, no ‘ty fanamparam-pahefana.
RRAG
Jolay 2012
--------