IZAY TIA NO ADALA… (RRAG)

IZAY TIA NO ADALA…
Aza tsaraina, ny foko fa adala,
efa tsy tiana, mbola tsy miala,
efa atositosika, tsy hisy mpijery,
nefa mbola ianao, dia ianao irery!
No indray fitanisany, fanehon’ny vava,
fitia nahadrodroka, tsy tiana ho rava.

Izay tia no adala, ka tsy hahalala,
ny fery hozakaina, mety hanafaka ny aina.
Izay tia no adala, ka tsy hahafoy ny hiala,
na dia ho ferinaina, sy aretin-tsaina!

Aza terena, ny foko hankahala,
fo ankiray, antsoiko malala!
Hamoizako ny aiko, raha toa ka ilaina,
hanereko ny saiko, mba tsy hitaraina.

Aza bodoana, terena hitia,
terena hankahala, olona tia.
Aza esoina, raha sendra mianjera,
ilay fitia tena izy, tsy notinerena.

Izay tia no adala, tsy mihevitra intsony,
fon’olon-kafa, mitondra lonilony.
Satria tokana, ny lokom-pitiavana,
ka tokana ihany, ny olona tiavina.
RRAG
20 Jona 2012
--------