KITIKITIKA… (RRAG)

KITIKITIKA…
Iny ilay mba nandry, nakanaka aina,
iny aho no nandre, tanana nisafo,
ny foko re nidoboka, resin’ny taintaina,
toy ny hoe natanika, teo afovoan’afo.

Iny ianao no reko, nanararao-namaha,
namaha ny bokotra, nanidy ny akanjoko.
Nanipaka ny zipo, nefa aho tsy sahy,
ka avy hatrany ianao naronjiko.

Iny ianao no reko, nisintona nanala,
nanala ny fehin-kibo, namatotra ny andilako.
Tsapatsapako ihany, fa tsy nisalasala,
na menatra akory, ny hatory teo anilako.
Dia ‘njay, nanorokoroka ahy, tsy nisy ahiahy!

Iny aho ‘lay mba nitoetra, nandamindamin-tsaina!
Iny no ninia, nitolona ahy izato ianao.
Reko ankehitriny, fa mbola fery an’aina,
irony kitikitika, niarahana nanao.

Iny aho ‘lay nieson-tory, tsy nahare na inona?
Iny no nanoroka, ny molotro ianao.
Ankehitriny ireny, novidiko ohatrinona?
Satria amin’izao, lavitra anao.

Ilay kitikitika, nitondra fahotana,
narahan’orokoroka, tanaty hadalana,
no nampitoetra, ny zaza an-kibonao,
izao anefa, ny vokatr’ireo natao.
RRAG
Jolay 2012
--------