LEFONA… (RRAG)
Mbola tsisy niantsa
(Nalaina tao amin'ny vetso.serasera.org)
LEFONA…Natsindrona lefona, efa harafesina, ny fo ‘zay nitia!
Nofinganina hianjera, hianjera tsy fidiny, ‘reo mpifankatia!
Tsy sedra voalahatra, fa hinian’ny hafa, hazera amin’ny lalany.
Tsy tena anjara, fa loto handotoana ny raki-tantarany!
Nafatotra rojo, dia nofonjaina, ny herim-pitiavany!
Hosihosena, ary koa antsafaina, hatramin’ny hananany!
Dia noterena, hanefa sazy, noho ny tsy nataony.
Tsy nohenoina akory, na modian-tsy re, ny antson-talahony!
Nasesika ho azy, ny heloky ny hafa, mba hozogainy!
Na dia tsy zaka, fa vesatra loatra, dia tsy maintsy lanjainy!
Ka iza amin’izato, milaza ho namany, no azo atokisana.
Fa ‘zay hiantsoam-bonjy, tsy nisy namaly, fa nilaza ho sahirana!
Ka moa ve, ho fahadisoany, ny hanala irery,
‘ty lefo-mitsatoka, eo amin’ny fony, ka milom-pery?
Moa kosa ve, heloka ho azy, ny mba mitady, izay fahafahany,
raha toa ny hafa, efa nanadino, nanadino ny anarany?
Natsatoka mafy, hanitaram -pery, ny lefo-maranitra!
Kapoky ny hafa, zary tsianjery, fa tsy todin’ny lanitra!
Nefa mavesatra, tsy efa holanjaina, ‘ty sedra midona.
Ràtra efa maimbo, fery tsy maina, no indro nilona!
Dia hofoanan’ny anio, ve ny fanantenana,
sa mbola ho voafafan’ny setra mandalo?
Ary mbola hitoetra ve, ilay hafanana,
raha toa ka misaona, ny fo izay mikalo?
RRAG
10 Jona 2012
--------
Rohy:
