MANGIDY MATSATSO MANGEROKA... - RRAG

Azo vakiana?

MANGIDY MATSATSO MANGEROKA...
Mangidy akia malala, ny saraka amin-tiana a!
Ny maso bongon-drano, sy resin-tory mafy!
Nisinda dia nanjavona, ny hiakam-pafaliana!
Hay ve ka ny fitiavana, koa mba mety maty?

Mangidy izany irery, kanefa tsy nahazatra!
Ny sento tsy niato, nikiky ny tanaty!
Ny hitsiky toa maneso, ny fo rakofan-dràtra!
Saingy mafy loatra, 'ty sedra ka tsy tanty.

Matsatso akia ry lala a! 'Lay ilaozan'olon-tiana!
Kanefa tsy ady akory, no nisy nifandirana.
Dia indro alo-maizina, manentom-pahoriana,
no lapa voatendry, voalahatra idirana!

Matsatso loatra izany, irery tsy mahasaraka!
Fotsiny ny vetso, no sisa afa-miazona!
Isika tokoa ve moa, tsy natao hiaraka,
no dia hatramin'ny tsiky, no zary ho avonavona?

Mangeroka ny fiainana, tsy misy anao tiavina!
Toa horohoro avy, ny taza-manodidina!
Nahoana ny hifamerina, akia no dia nolavina?
Kanefa raha irery, tokan'ela-tsy mahasidina!

Mangeroka tokoa, ny fisaraham-belona!
Raha toa tsy nisy antony, mavesatra tsy zaka!
Fa ny fitia koa ve moa, amin'ny olombelona,
toy ny fiainana ihany, isan-dakalaka?
RRAG
29 Oktôbra 2021

Mombamomba

Mpanoratra : RRAG

Nampiditra : RRAG
Daty : 29/10/2021
Mpamangy : 123
Mankafy : 0

Tononkalo hafa

NISARAKA HONO…!
"LOVE" AKIA NY FO A!
VATO MIKITOANTOANA…
NIVOLY SANATRIA...
TSY NIHOMANA...
NY FIANTOMBOHAN’NY FARANY…!
MISY TSY MISY…!
TOA TEO AVOKOA…
ETRE UN HOMME
NY ENY SY NY TSIA...!