MARIAZIN-JANAKO… (RRAG)

MARIAZIN-JANAKO…
Nihiboka hafaliana, velon-dranomaso,
nitsiky toa mangina, fa resy ilay ankaso.
‘Lay mariazin-janako, ‘zay nofiko omaly,
no tanteraka ihany, k’injao ny foko faly.

Ora tsy nampoiziko, fa mbola ho hatrehiko!
Andro nofinofiko, ho tratram-pahanterako,
‘ty andro sarobidy, tokana aman-tany.
Enga anie ho hafaliana, fa tsy hivadika ho tomany!

Mariazin-janako, ‘lay niandrasako hatry ny ela!
Tonga ihany anio, ka hahafahako midera,
‘lay voady izay madio, nilofosany hatrizay.
Ka indro zary voady, voadim-po mandrakizay!

Mariazin-janako, tsy mba nofy intsony,
tsy tantara toy ny angano, na resa-bava tsy mitony.
Fa tena tantara toa tantara, ka tsy ho fanta-piafara,
nefa! Raha ny fahendreny, dia hinoako fa ho tsara!

Ry tokan’ny aiko, tokam-poko,
etsy ianao, hafarako ihany,
na dia tony aza aho,
ny saiko toa mandà izany.
Mahareta tokantrano,
na amin-tsedra na angano.
Na amim-paty sy aretina,
dia aza avela ho harafesina,
ny voady izay ho atao.
Sao ny foko hitalaho,
ka handràtra anao tsy fidiny.
RRAG
Febroary 2012
--------