MILOM-PERY… (RRAG)

MILOM-PERY…
Hangina aho raha toa, ozona ho ahy!
Hiala aho satria, tsy tian’ialahy!
Tsarovy kosa anefa, fa ny lahatry ny anio,
tsy maintsy ho levon-taona, hivadika tadio.
Dia hiverina hazava, tsy horakofan-javona,
‘lay taratry ny maraina, toa lasa niavonavona.
Ka hitomany hifona, hilady amin’ny foko,
ary hiangavy mafy, manahy ny hosoloiko.
Nefa indrisy, fa ianao ‘lay nialangalana,
no lavo tsy fidiny, teny an-tsampan-dalana.
Milom-pery maimbo ka, nohadinoin’ny foko!

Hangina aho raha toa, tody voatokana ho ahy!
Hiala aho satria, efa resy, hatramin’ny fanahy!
Nefa kosa tadidio, fa ny tendrim-piainantsika,
tsy fantatry ny anio, raha toa ka hangatsiaka!
Na mety, hitondra hafanana, tsy hoseranan-tsedra,
ka ‘lay tia mihitsy, no tsy mba miady seza.
Fa miandry tolo-tanana, voarakitra ho tantara!
Miandry izay ho namana, voasoritry ny anjara.
Nefa indrisy, toa nofy ihany izany,
fa raha ny eto an-tany dia, fonenan-dratomany.
Fitia milom-pery, miendrika tsianjery, hankahalain’ny foko!

Hangina aho raha toa, ny tsiny koa ho ahy!
Handefitra aho satria, efa tsy mba sahy!
Ataovy an-tsaina kosa, fa ny vintana sy anjara,
dia samy laha-piainana, mamaritra tantara!
Raha toa ka hain’ny tena, ny mitrandraka azy tsara.

Hangina aho raha toa, ny ferin’itsy lasako,
no mbola mety ho zavona, handrakotra ny kasako!
Dia indro hampitaiko eto, f’izao no hany hafatro,
mitiavà hafa akia a! Tsy mizaka toy ny ràtrako.
Mitiavà tsisy fery, nahatody izay tsy takatro!
RRAG
11 Jona 2012
--------