MISITERIN’NY FITIA… (RRAG)

MISITERIN’NY FITIA…
Tsy ny teny aloa-bava, no fambara ny fitiavana.
Tsy ny fihetsika mazava, no ahafahana mihavana,
fa ‘lay ao am-po mitroatra, mikiry mafy ny ho aboraka.
Io ilay tsy niloaka, te hiantsampy, te hiantoraka!

Sarisarin-jaridaina, misy vony maro loko,
misy fanahy, misy saina, misy fo mitoloko,
misy raozy, misy lisy, misy bozaka aman’ahitra.
Fa ny fo rehefa tia, dia mitepo tsy mitsahatra!

Tsy ny maso vao nahita, no afaka hilaza tia,
tsy ny sai-mamisavisa, no hoe manam-pitia.
Fa ‘lay fo midobodoboka, no mitahiry tsiry vao,
ao izy no midoroboka, vao sahy miloaka aminao.

Ny misiterin’ny fitia dia, fitambaran-tsinga telo,
eo ny maso mitinaratra , sy ny saina mihelohelo,
ary koa ny aty fo, manana tsiambaratelo.

Ny misiterin’ny fitia, dia fifamatoran-teny,
ny maso ery dia mankafỳ, sady variana mijery.
Fa raha ny saina indray, mamakafaka ity hotiavina,
ny fo mihavana amin’ny tiana, fa tsy sahy miavonavona.

“F(ỳ)i ”, fiatombohana mamaritra, fifankahitan’olon-droa.
“Tia”, famaritra tantara, vao miatomboka miandoha.
“(H)avana”, fifamatoram-pihavanana, vokatry ny fo.
Ka raha feno ‘reo, dia tanteraka ‘lay hoe: “Sambatra tokoa”.
RRAG
12 Febroary 2018
--------