MITSINGERINA (RRAG)

MITSINGERINA
Mitsingerina anio, ilay andro nihaonantsika,
ka ny foko no injay, mitanisa ny efa vita,
sy ‘reo voady velirano, narahin-toky sesehena,
voady efa tamin’ny lanitra, toky vita tamin’ny firenena.

Mitsingerina anio, ilay andro hany tokana,
namborahako ‘lay feo, tahirin’ny efitro manokana,
dia ‘lay hoe tiako ianao, diso tiako loatra,
ka ny entam-poko anaty, no ahiako ho tafahoatra.

Mitsingerina anio, ‘lay andron-teny mamy,
nifanaovantsika roa, ka dia samy nitomany.
Mitsingerin’izy anio, ka hany tokam-panomezako,
dia ny manamafy hatrany, fa ianao no tehezako.
Ianao no hany fototra, hany antony hivelomako,
ka na iza hoe hisompatra? Dia ianao ilay tokako,
‘lay hany tokako eto an-tany, nanasitrana ny foko,
tsy mba tan-kisarisary, fa tena fitolokolokoko!

Mitsingerina anio, ireny lasa ireny,
lasam-pahafahana, nahafahan’ny fo niteny,
namoaka ny tahiriny, sy ny kanto indrindra,
nanala ny hirifiriny, nanova ny famindra.

Mitsingerina anio, ka hotsarovantsika izany,
aoka izay ny alahelo, avelao ny tomany.
Avelao ireo handeha, fa aza tànana ela intsony,
anio koa ‘lay andro, hahafaha-mampitony,
ireo mpifankatia hafa, nisedra ady mazana,
ka noteren’ny laha-piainana, notereny mba hisaraka.

Anio no hanehoako, fa mbola voatahiry,
efa ela ihany, fa tsy vao nitsiry,
ireto teny ireto, ka eo mba henoy:
“Tiako ianao, toa tsy haiko ny hafoy”.
RRAG
Aprily 2012
--------