NANDEHA I NENY… (RRAG)

NANDEHA I NENY…
Aza mitomany,
na misento akory,
noho ny laha-tany,
dia tsy maintsy ho ory.

Lasa i Neny,
‘lay fihantahanta iny,
voatery ny nandao,
satria mpivahiny.

Aza manaiky resy,
na mafy aza ny ady
mananà koa finoana,
na dia tsy nisy voady,
natao tamin’ny lanitra.
Sahia ianao mijoro,
na dia hoe mahantra,
tsy manan-kianteherana,
na koa mba ho hantenaina,
ka zary fahasorenana,
ny vesatry ny saina.

Nandeha i Neny,
nahoana no tsy hitomany,
raha mbola hahatsapa ihany,
fa avy amin’ny fonosany?
Eny, avy amin’ny filofosany.

Nandeha i Neny,
nefa tsisy azo hoe natao,
nanakanana azy,
fa io no raorao,
izay zary tady,
namatotra ‘lay teny,
hoe nandeha i Neny.
RRAG
Aprily 2012
--------