‘NDRE…! (RRAG)
Mbola tsisy niantsa
(Nalaina tao amin'ny vetso.serasera.org)
‘NDRE…!‘Ndre ‘ty raho-mitatao, mitondra alahelo!
Nanafina ny marina, nanorina tsiambaratelo.
Tantaram-pirenena, tsy hita hofotorana,
tsy vitan’ny nafenina, fa ihany koa nodorana.
‘Ndre ‘ty ranomaso, nanafina hatezerana,
nirotsaka tsy fidiny, noho ny fandeferana!
Fa raha ny zoga nentinao, ry fireneko tena vesatra,
nahay nandefitra ianao, sady nanam-paharetana.
‘Ndre ireto maso, mitily lavitra ny tiana!
Nahatsapa fo miankaso, saingy indrisy fa variana.
Dia nanaiky ny ho resy, tsy nitolona akory,
tsy niezaka ny niady, ny hakàna ny zony.
‘Ndre ireto ankizy maro, nanantena fahafahana!
Nofonjaim-pahavalo, dia avy eo natosi-tanana.
Tsy nisy hafa mba nijery, nitily maso azy ireo.
Ankehitriny misitery, izay zavatra niseho.
Injay misioka mangina, misaona am-po milefaka!
Tsy ny lavitra olon-tiana, no tena tsapany ho vesatra.
Fa ny mahita firenena, noravan’ny mpanjanataniny,
raha ny fery nozakaina, tsy voavidin’ny tomaniny.
‘Ndre ‘ty fo nanaiky resy, ho fanavotam-pirenena!
Saingy indrisy nisy fetsy, tena olona tia tena.
Ninia nanakana ny tolona, niaretana aman-taona!
Novonoiny ireo olona, dia ny Gasy no nisaona.
‘Ndre ‘ty fery nialin’andro, tao am-po tsy mbola zatra!
Nanaron-taratra masoandro, ka nanitatra ny ràtra.
Dia noho ny firenena, no nanaovany ireny!
Ho an’ny firenena, no hijoroany anio hiteny.
RRAG
Jolay 2012
--------
Rohy:
