NY FONY… (RRAG)

NY FONY…
Tiany ianao fa aza manahy,
ny voady ny azy sora-drà.
Tsy lefin-drahona mandalo!
Tsy potiky ny amboaran-tsiaro,
izay mandrafitra ny lasany,
fa fototry ny tena kasany.

Sora-mitoetra,
tsy mba nasiany fetra!
‘Lay misoritra ao am-pony,
‘zay tsy mbola nohadinoiny.

Ny fony ny azy tsy manahy,
fa ianao no toa tsy sahy,
hiara-hitolona aminy, raha toa,
fantatrao fa hahasoa.

Ka ny fitia ‘zay voatahiriny,
tsy hozarainy amin’ny hafa.
Fa ianao ‘lay nofikiriny,
moa hanaiky azy ka tsy handatsa?
Na haneso ny fitafiny,
izay rovitry ny hasasaram-piainana,
ka any aminao, no mety azony hitarainana.

Tiany ianao fa aza matahotra,
manatona fa aza miahotra.
Fa ny fitia izay omeny,
dia ‘lay amboaram-pandreseny.

Tiany ianao ry tokan’ny ainy,
na dia mamaky ny sainy.
Tiany ianao na dia nandràtra,
toy ny soritry ny lasa.
RRAG
Janoary 2012
--------