OLY MPAMPIHAVANA… (RRAG)

OLY MPAMPIHAVANA…
Feon’ankizy mitomany, no nanaitra fo hangoraka.
Feon-jaza an-tokontany, milalao miorakoraka.
Feon-tsodina misioka, manafàna takariva.
Feom-baliha iray migoka, ny hakanton’ny antsiva,
no olim-po ‘lay manirery, mivetsovetso irony kalo.
Anaty saina mitsianjery, ‘lay zazavavy iray mpandalo.

Siokan-tia miantso tiana, no re avy any am-bavahady.
Siokam-boronkely mihira, ‘lay tononkiran’ny mpivady,
vnahavita dina tsy ela, teo anoloan’ny alitara.
No oly raikitra tsianjery, nandrafetana tantara.

Olin-draozy, olim-boahangy, fela-mani-mpitahiry.
Nafafy teo an-jaridaina, fa nantenaina ny hitsiry,
no indro tohana nanakana, fo roa tsy hifankatia.
Oly iray no zary sakana, nandrava ilay fitia.

Tokana fitazana, mandravaka ny felana.
Oly mpampihavana, miaina am-pandeferana,
manambatra fitaratra, vakin-draorao!
Mitsabo fo maràtra, resin’ny talaho.

Olim-pamikirana, raha sendra tosi-tanana.
Oly tsy manilika, tsy manavakava-namana.
Milefitra hatrany, ny lefona hatoraka.
Mangina tsy miteny, fa olim-po mangoraka.
RRAG
16 Janoary 2013
--------