RAOZIM-PASANA… (RRAG)

RAOZIM-PASANA…
Tsy noheveriko ho somongamonga, ilay fitia natolotrao!
Tsy noheveriko ho sangisangy, eny hatramin’izao.
Nefa indrisy fa ankosotra loatra, toa niloko fotsiny ihany!
Tsy mba lokon’ny fo te hivoatra, fa dia lokom-bolontany.

Tsy noheveriko ho anio dia anio, no hifarana ny endri-tantara!
Tsy noheviriko ho izao dieny izao, no hadinoina ‘reo sora-tsara,
tamin’ireny lasantsika ireny, ‘zay hany toa sisa tsiaroko!
Kinanjo alahelo ni misomebiseby, manarona ny atin’ny tranoko.

Toa nokiriko nalevina ihany, nefa injay toa nitsiry tsy maty,
ilay fitia izay nihiboka fery, no misononoka miery ao anaty.
Nototofako hilevina f’indrisy, naniry tsy nilàna tondraka,
‘ty fitia efa ravan’ny omaly, no nitsangan-tsy nety nirodana!

Teo ny foko vao nilaza tsy nahy, hoe fitia raozim-pasan’ny ràtra,
no niverina nahajamba ahy, tety an-kianja nahazatra!
Na dia efa hita taratra aza, ny ho mety mbola hiafarany!
Na koa vinaniana handoatra, ny fery efa ambanin’ny tany!

Raozim-pasana nitsiry fanahy, sisasisa fa tena manonja!
Raozim-pasan-tahirin-tsiaro, trano ihany miary fonja.
Dia raozim-pasana ihany anefa, no mety ho fanalahidy,
ka aleo hitamberina eny, ny tsiarony mbamin-tadidy!

Dia ny omaly toy ny anio ihany, ny anio hitoetra rahampitso!
Ka na hisitrika ambany dia ambany, hoe hilefa ny ady masiso,
dia hitambesaran’ny lasa tsy maty, naizanaiza ny tany aleha!
Tsy maintsy hiafaran’ny tomany, na hijanona aza ka tsy handeha.

Raozim-pasana mpikiky, toa koa mpanjaitra ny efa tataka!
Ilay famatotry ny hoavy, mety hitondra ho any an-davaka.
Raozim-pasana mpanitatra, ny fery maimbo sy masiso,
nefa mpanamaina ràtram-po, sy mpitsabo ny ampitso.
RRAG
Aprily 2012
--------