SAFIDY SA LAHATRA? (RRAG)
Mbola tsisy niantsa
(Nalaina tao amin'ny vetso.serasera.org)
SAFIDY SA LAHATRA?Indro tokoa fa dia vaky ny loha.
Ny fitiavana ve mba safidin’ny fo?
Sa lahatra ihany tsy azo amaharana?
Dia mangina ka miaiky izay fandaharana!
Toa tomefy loatra ny sedra hosedraina,
misy amin’ireny mila haningotra ny aty.
Ka raha safidy tsy aleo mba dikaina,
izay mantsy no hinoako tsy hamono hahafaty.
Ny lahatra manko toa hoe ‘zay voasoratra,
tsy misy azo atao hamafàna azy ireny.
Sady tsy afa-mitroatra ny fo te hangoraka,
na hikiry hiloaka aza ny vava hiteny.
Ny lahatra koa dia tsy afaka hoferana,
ka hoe hatreto no anjara tandrify.
Io mitoetra fa tsy mba miserana,
mifikitra foana sady toa mitampify.
Efa tsy mahagaga ny hevitry ny hafa,
fa hoe lahatra io tolo-janahary.
Nefa tokoa moa raha banjinina ny lasa,
toa marina ihany fa tinendry voajary!
Ka lahatra ve ny mitia sa safidy?
Nahoana anefa no tsy izay tiana no atao?
Fa dia miara-mitoetra ny mamy, mangidy.
Lahatra ve izy sa safidy hoy ianao?
RRAG
26 Martsa 2018
--------
Rohy:
