SOKAFY NY VAVA RAHA TE HIGADRA…! (RRAG)

SOKAFY NY VAVA RAHA TE HIGADRA…!
Tahotra mafy ny an’ny mpanohitra,
nefa toa fỳ ny seza tadiavina.
Ka na dia efa tsy afa-manohitra,
dia mbola mitady lalana hodiavina!

Kinga ery ry be kasikety,
hamoaka ny basy an-dakazeri…!
Tsy fantatra intsony ‘zay mety sy tsy mety,
fa nidina ny baikon-dRakôlônely.

Mihovitra avy ny iray firenena,
manidy ny tranony hitakokokokoana.
Ka izay rehetra mihenahena,
veloma lery, fa ho Antanimora!

Sokafy ny vava raha te higadra,
hoy ‘ngahy filoha miforitra an-dapa.
Matahotra ery ny naloaka ny vava,
ka ny miaramila no navela hanjaka.

Dia gaboraraka ity firenena!
Ny mpanohitra nitsatsaka ny ady an-dapa.
Ny mpitondra natahotra dia niaro-tena.
Ka ny miaramila no manjakazaka!

Izay ny anao ry fireneko,
sakafom-bahoaka ny tahotra lava.
Nefa ianao tsy afaka ny hotereko,
hanokatra ny vavan’ireo basivava!
RRAG
Janoary 2012
--------