TAPITRA…! (RRAG)
Mbola tsisy niantsa
(Nalaina tao amin'ny vetso.serasera.org)
TAPITRA…!Zendana ny tena, hontsa ny aty fo,
indray nipimaso, rava ny antsikaroa.
Saingy ny tsy zaka, dia ny fitaka natao,
nitondra fo naràtra, fa tsy noheverinao.
Teny an’alitara, no ringana ny antsika!
Nahita azy ianao dia, zary nangatsiaka,
niova ho ranomandry, ny fitia nitoetra.
Izany ve ry tiako, tsy efa ho herisetra?
Vavolombeloko izy, namako hatrizay,
tsy nampoiziko hoe, efa tany kay!
Ny masonao niantsampy, nibanjimbanjina azy,
ka avy ianao ry tiako, dia nanapaka ‘ty tady,
nifamatorantsika, eny hatramin’ny ela.
Lasa ianareo dia, izaho no tavela,
niondrika tsy satry, menatr’ireo nasaina,
nanontany tena hoe, moa va salama saina,
no mitomany irery, imason’olo-maro,
kanefa anie tsy izaho, no nanangam-pahavalo?
Fa ny fitiavanao sy ny azy, ilay natokisako,
ekeko aloha anio raha, izany no mba vintako.
Zakaiko izay ràtra, sy fery amin’ny tenako!
Avelako ho rava, ny fitia zary fonenako,
fa ny hany tsy noheveriko, ay ka mamirifiry!
Ny manongotra amin’ny fotony, fitia tsara tsiry.
Moa ve mba nojinerenao, ny ranomasom-poko,
narotsaky ny tava, sy ny aty nitoloko?
Moa tsapanao, ny ràtra entin’ny aiko,
noho ny fitakao, namery ny atin-tsaiko?
Eny tiako ianao, toa diso tiako ianao,
ka hany tsy nampoiziko, hiafara toy izao,
ireo vina maro, niarahana namaritra.
Saingy indrisy fa, voafetra mba ho “TAPITRA”.
RRAG
10 Aprily 2018
--------
Rohy:
