You are here: home > Vetso

TSIARO...! (MALALA A!) - RRAG

Azo vakiana?

TSIARO...! (MALALA A! .... 1 Febroary 2018)
Tsy tefy ianao tsy zaitra, fa volavolan-tany,
rafi-tanimanga, vita tsara kaly.
Sombin'ity aiko, ny aina ao aminao,
malala a! Tsy ary ianao moa hisy izaho?

Tsy mendrika akory, ny ho ary raha izaho,
raha toa anie malala ka, tsy hisy avy ianao.
Tsy satriko ny ho velona, ilavitra anao,
na ho haizina aza no iainako, rakofan'ny talaho.

Ary izany ianao o? Eny! Tena misy ianao,
ka rariny raha toa, ka hisy koa izaho.
F'isika izao 'lay hoe, tanana sy rantsany,
mifameno foana, tsy tohitry ny sakany.

Napetraka ho hisy, navola mba ho ary,
narafitra hitoetra, ho voajanahary.
Natambatamba-tsaina, ho singa iray sy tokana,
navahana ho ahy, ho anjarako manokana.

Raha toa ka misy ianao, kanefa tsisy izaho,
dia nofy ampitsanganana, izay rehetra hitoeranao.
Ihany koa hoe tsy eo ianao, saingy io izao aho,
dia aloka avokoa 'zany, izao tontolo izao!
RRAG
01 Febroary 2019
Tsara  ho  fantatra:
Mila hay ny manavaka ny teny hoe:  “Ary” sy “Hary”. Ny “Ary” dia midika hoe misy ary ny “Hary” kosa dia midika harena. Ka noho izany dia mila fahalalana ny fampiasana ireo teny roa samihafa nefa mifamatotra ireo.

Hametraka hevitra

Midira aloha