TSY ORY… (RRAG)

TSY ORY…
Kamboty Ray sy Reny, tsy manan-kianteherana,
mahantra fitia,
tsy misy fo miantra, mitondra tambitamby,
manarona ny dia,
fa sotasota lava, anaty sangisangy,
mandràtra fo mamery, arahin-teritery.
Teny feno latsa, tsipika famerana,
ireo dingana azo aleha.

Kamboty Ray sy Reny, tsy afaka manohitra,
solafaky ny fiainana,
nilaozan’ireo namana, tavela dia taraiky,
teny amoron-dalana,
mangataka ny arapaka, miezaka mitroatra.
Saingy raha sendra manana, dia tsy afaka mihoatra,
alaina ny eny an-tanana, fa lazaina tafahoatra!

Kamboty Ray sy Reny, lazaina fa tsy ory,
fa manana mpiahy,
saingy toa manahy, fa na dia alin-tokana,
tsy misy iray mba sahy,
manatona azy mora, manarona fitafy,
hiarovany ny hatsiaka, ‘zay tsy ahitany tory,
hiaretany ahiahy.
Fa raha misy hafanana, hitondra torimaso,
ny hifohazany maraina, dia tsy ho reny intsony.
Raha toa ka tafatory, ka reno-pahasambarana,
anaty nofinofy, sady tsy ory intsony.
RRAG
15 Janoary 2013
--------