VOLANTANTELIN-DRANOMASO… (RRAG)

VOLANTANTELIN-DRANOMASO…
Fifaliana kely, voatokana hiserana!
Fitia nitsianjery, nalaky ny namelana!
Kanefa, injay vao vaky ravina,
dia maina, sy nosaronan-javona.

‘Zay zavona matevina, arahin’oram-baratra.
Ka zary lasa nofy, ‘lay any hoe hisambatra.
Nantenain’ny fo, fa tsy lefin’ny ankaso,
nefa indrisy, vao namony dia natsatso.

‘Lay fitia tsy maty akory, fa ianao no nandeha!
Noteren’ny laha-piainana, hamakivaky lalan-kafa!
Nefa anie ny tao anaty, ka nahasahy nirehareha,
saingy indrisy lavo ianao, dia nanafoana ny kinasa.

Resin’ny fasana, ‘lay fitia vao mba namony!
Resin’ny fasana, ‘lay fo, ka tsy afaka hitony,
satria ianao dia nazerany, tsy navelany ho ahy!
Nofatorany nambenany, sao ihany ka hivaha!

Tsy voavahanao intsony, ilay tady nofatorany!
Ka zary hoentinao matory, amin’ny tany fiorenany,
‘lay fitia izay mamatotra, ny fontsika hiara-dia.
Na dia ho levona aza ianao, ny foko hihiboka fitia!

Volantantelin-dranomaso, mitahiry ràtram-po.
‘Lay fifaliana ora vitsy, no hany mba niotazan-tsoa.
Na dia niserantserana aza, ka nivadika ho tomany,
dia ianao tiako foana, raha mbola tany koa ny tany!

Volantantelin-dranomaso, tahiry tsy mba maty!
Mitoetra ao am-poko, zary nofy toa tsy tanty,
zary ràtra toa mamery, ka manindrona ny aiko!
Tsy ho zakako ny irery, miverena sombin’ny aiko!
RRAG
Febroary 2012
--------