TSY HO RAVA TSY AKORY (Vanjanofy)

Injay fa tsinapako mbola mafana
sy mamy ao anatiko ny hanina anao
mbola mamiratra tsy azo fafana
‘lay bika nanjary tsy foiko hatrizao !



Tsy maty tsy akory fa mbola ao ihany
‘reo raki-pitia nokoloina fahiny
zary hasambarako iray eto an-tany
ny fahatsiarovana ny orokao iny !



Ho reraka foana eo ‘reo mpanakora
hamingana antsika hianjera amin’ny tany
na inona sakana afitsoky ny ora
ny fotsika indray tsy ho lefin’izany !



Adalana ihany ny an’ny tany
hanelanelana antsika tsy hihaona
sao dia heveriny fa ‘zay izany
no handrava ‘lay androm-pitia lohataona !?



Tsy hisy tsy akory ‘zay fanadinoina
hamalona ny andro niaraha-nanondro
ny foko efa anao mbola hitempo ao foana
hirehitra mora toa afon’apombo !
--------