AKANIN’NY LAHATRA… (RRAG)

AKANIN’NY LAHATRA…
Tsy maintsy ho ianao, no faran’ny akany!
Tsy maintsy ianao, no fototry ny tomany!
Tsy maintsy ianao, no handrava ny efa vita!
Tsy maintsy mbola ianao, no tsy hahatafita!

Ry akanin’ny lahatra, ianao ‘lay fatoran’ito ratsy,
mamatotra ny aina, mangeja azy mafy,
mihazona azy, mba tsy ho tafita,
zaridainam-pahoriana, efa tsy voatanisa.

Ry akanin’ny lahatra, ianao ‘lay fatorana, saro-bahana.
Ianao ‘lay nanosika, fa tsy mba nitàna.
Ianao no fototry ny ratsy rehetra.
Nefa indrisy! Fa ny fahefanao, toa tsy mba nisy fetra.

Saingy ity no tsarovy, fa ny vatako no anao,
fa raha ny fanahiko, tsy mba ho azonao,
na inona hery, ampiasainao, haminganana azy?
Dia tsarovy hatrany, fa mbola vonon-kiady,
na ny mba handreseny, tsy ho handevozinao.
Hangina aho, hangina tsy hiteny, sady tsy hitalaho!

Nefa koa tandremo, ry akanin’ny lahatra.
Tandremo, fa tsy maintsy mbola hitsahatra.
Na ho ela na ho faingana, dia andriko eny foana,
na hoe hangina aza aho, tsy hidika akory hoe moana.
RRAG
Jolay 2012
--------