ANDOLAL’AINA, RA.GABY, NANANDO… (RRAG)

ANDOLAL’AINA, RA.GABY, NANANDO…
‘Ndeha havalona eto, ho zary toy ny nofy, ianao ry ‘lay anarana.
Tsy maintsy koa hisento, ‘ty fo efa farofy, mahatsapa fa hifarana,
ny diam-peninao, ilay rakitra tantara, anatra fampita.
Tosika famarana, ny dingam-bitanao, sy ‘zay mbola tsy hita.

Raha ny efa vitanao, no isan’ny hofoanana, hanaraka ny lasa.
Dia izao dia ‘zao, misy ny fotoana, ataovy indray ny kasa.
Avereno eto, irony dian-tanana, nandreraka ny aina.
Satria raha tsy eo ireny, dia ho mafy hatrany, ny herin’ny taraina.

Raha ny sitrakao, efa fantatro ihany, na dia tsy ho hambara.
‘Reny mihitsy, no isan’ny nandravaka, hahakanto irony amboara,
anaty fo mangina, miandry fanantena, miandry fo hiantra.
Tsy hisy iray akory, mety ho tavela, hiangarana ho hahantra.

Nanando…! Solon’anarana, saingy toetranao.
Nitondra fahasahiana, hamboraka ny marina, am-pon’ny mitalaho.
Nitondra fanahina, saingy lefy ihany, noho ‘reo vetsom-po.
Sarotra ny hilaza, fa ny sora-tananao, dia tsy avy any am-po.

Ra.Gaby…! Taona sivy izao, no nahafahanao, namboraka ny marina.
Taona maro, saingy mbola vitsy, ireo nianjera no tafarina.
Nisy aza niahy solafaka, noho ny asanao nandràtra fo,
saingy vitsy raha mihoatra, ireo mpamaky sendra soa.
Fa nanasitrana ihany koa, ny kapo-teninao ankolaka.
Nitsabo diso fanantena, nanotra fo, ‘zay sendra folaka.
Nanosi-po sendra trotraka, tsy sahy niroso an’ady intsony.
Ny asanao no hany toraka, nanasitrana ny fony.

Andolal’aina…! Tena anaranao mihitsy, famatotry ny toetranao.
Aina fototra mitoetra, zatra ady toy izao.
Saingy toy ny maro ihany, mba mitroatra raha mianjera.
Ny solon’anaranao, dia efa ampy, ho fandresena.
RRAG
16 Janoary 2013
--------