BAIBOLY EFA ROTIKA… (RRAG)
Pas encore lu
(Nalaina tao amin'ny vetso.serasera.org)
BAIBOLY EFA ROTIKA…Somebiseby ‘ty ny foko, hamonjy ilay fiangonana,
‘zay foto-pinoako, na dia avy aza ny orana.
Baiboly efa tonta, efa rotidrotika ihany,
no indro mba fivimbiko, toy ny isan’andro hatrany.
Dia aty amiko ny jery, ny maso-mpitazana,
toa mandinika ny akanjoko, mandinika ahy fatratra!
‘Ndreo mihazonazon-doha, dia mitsiky toa maneso!
Mandinika ny an-tanako, dia mody mivetso.
Nefa toa mandatsa ihany!
Tsy ahoako akory, fa io aza no mba lovako,
sisa lova mba tsy ringana, nanaraka an’i Dadabeko.
Ka na ho maso an’alin-kisa, na ho eso tsy hita isaina,
dia hiniako tsy ho hita, tsy ataoko hamaky saina.
Nanomboka ny vavaka, Genesisy tamin’izay!
Io ‘lay toriteny niavaka, ho tahiry mandrakizay,
fa voaloha-namakiana, ilay baiboly rotiko!
Voaloham-bakiteny, ren’ireto sofiko!
Baiboly efa rotika, efa sisasisam-patana!
Baiboly efa potika, efa tokony ho any am-pasana!
Nefa mbola toa tsy foiko, fa tsiahin’ny omaly,
dia ‘lay tany am-piangonana, foiny ny foko falifaly,
noho ny nandinihanao ahy, eny! Ambony ambany!
Ka tsy nanananao ahiahy, ny mba nanontany,
hoe:”Avy aiza izato boky, toa tahiry tsy mba maty?”.
Dia hoy aho taminao: “Tsy avy aiza re, fa tao anaty”.
Nefa toa nampitsiky anao!
Somebiseby indray ny foko, ny hiverenan’ilay andro,
hany tokam-baiboliko, izay nahitany ny masoandro.
Toy ‘lay nentinao, tsy mba narahinao latsa!
Fa tsinjaram-po mangina, nefa dia toetranao mahazatra!
RRAG
Aprily 2012
--------
Lien:
