ETO AHO… (2012) (RRAG)

ETO AHO…
Eto an-kianjam-panoratana
aho, no mamezivezy penina.
Andraketako ny mamy,
izay mihombo noho ny nenina,
navela tany ho any.
Niandrasako hitamberina
kanefa, indrisy tsy niverina,
fa lasa akanin’ny tomany.

Eto anoloan’ny sedra mafy
aho, vao nahatsiaro anao tomany.
Hoy ianao tamiko hoe: “Tsy tanty
ny hetraketraky ny tany”.

Eto anatrehan-draha nataoko
aho, no mitsiahy anao mangina.
Ianao ‘lay olon-tiako,
navela hitondra fahoriana.

Eto anilan’olon-kafa
aho, no manenina, amin’ny ratsy vitako.
Ny tsy nahavitako ireo kinasa,
fato-maty namikirako.

Eto an-dalam-pahafatesana
aho, no misento miala aina.
Asa ny alim-piambesana,
raha mba hiasanao saina.

Eto am-pizakana ireo vitako
aho, no mitomany dia manenina.
Mizoga ny vokatry ny ditrako,
Afo io ka tsy azo hafenina.
RRAG
11 Jona 2012
--------